МЭНДЧИЛГЭЭ

Gerelmaa
Gerelmaa

ТӨЛӨӨЛӨН УДИРДАХ ЗӨВЛӨЛИЙН ДАРГА

Д.ГЭРЭЛМАА

Хүндэт хувьцаа эзэмшигчид та бүхэнд энэ өдрийн мэндийг хүргэе.

Бид 2020 оны үйл ажиллагааны үр дүн, амжилт ололт болон цаашид сайжруулан хөгжүүлэх ажлуудаа тайлагнах хариуцлагатай цаг ирлээ.

“Говь ХК” анх 1981 онд байгуулагдаж, олон хүний хичээл зүтгэл, хүч хөдөлмөр шингэн өдийг хүртэл амжилттай үйл ажиллагаа явуулсаар ирлээ. Манай компани Монголын хөрөнгийн биржийн ТОП-20 индексийн багцад багтдаг бөгөөд хөрөнгийн зах зээлд идэвхтэй байр суурьтай билээ. Бид 2020 онд “Шилдэг хувьцаат компани”-аар шалгарч, үндэсний том үйлдвэрлэгч, салбартаа тэргүүлэгчийнхээ манлайллыг улам бүр бэхжүүлсний зэрэгцээ томоохон түүхэн үйл явдал тохиосон нь “Говь ХК” төрийн дээд шагнал Сүхбаатарын Одонгоор шагнуулсныг дурдах нь зүйн хэрэг юм. Шагналын эзэд болох үе үеийн удирдлага, одоогийн баг хамт олон, нийт ажиллагсдадаа халуун баярыг ахин хүргэе!

2020 он бидэнд амжилт ололтыг мөн сорилтуудыг ч авчирсан жил байлаа. Дэлхий дахиныг хамраад буй КОВИД-19 цар тахлын байдал бидний үйл ажиллагаанд тодорхой нөлөөлөл үзүүлсэн ч бид сайн засаглалын зарчмууд, чадварлаг гүйцэтгэх удирдлагын баг, ажиллагсдын хичээл зүтгэл болоод стратегийн чиг хандлагуудыг баримтлан тохиолдоод буй нөхцөл байдалд түргэн хариу арга хэмжээ авч ажиллалаа. Хэдий эдийн засгийн нөхцөл байдал болоод манай улсад ирэх жуулчдын урсгал зогссон нь дотоодын борлуулалтад нөлөөлсөн ч бид олон улсын зах зээлд шинэ онлайн сувгуудыг амжилттай нээж, борлуулалтаа 6 дахин өсгөж чадлаа.

Бид цаашид цар тахлын энэхүү нөхцөл байдалд эрсдэлүүдээ тооцон, эрүүл мэндийн аюулгүй байдлыг чанд сахин ажиллаж, дотоод болон олон улсын онлайн сувгуудаа улам хөгжүүлэн ажиллахаар төлөвлөөд байна.

2020 онд амаргүй цаг хугацаанд зорилгодоо хүрэхийн тулд бүтээлч, шантралгүй ажилласан компанийн удирдлагууд, ТУЗ-ийн гишүүд болон нийт ажиллагсдадаа талархал дэвшүүлье.

Та бүхэнд ажлын өндөр амжилт, эрүүл энх, сайн сайхан бүхнийг хүсэн ерөөе!