Мэндчилгээ

Д.ГЭРЭЛМАА
Д.ГЭРЭЛМАА

ТӨЛӨӨЛӨН УДИРДАХ ЗӨВЛӨЛИЙН ДАРГА

Д.ГЭРЭЛМАА

Хүндэт хувьцаа эзэмшигчид та бүхэнд энэ өдрийн мэндийг хүргэе.

 

Энэ онд Говь ХК маань 40 жилийн ойгоо тэмдэглэсэн бөгөөд 1981 онд байгуулагдсанаасаа хойш хөрөнгө оруулагч, хувьцаа эзэмшигч, бэлтгэн нийлүүлэгч, хэрэглэгч, харилцагчид болон компанийн удирдлага, ажилтнуудынхаа хичээл зүтгэл, хүч хөдөлмөрийн үр дүнд үйл ажиллагаагаа улам бүр өргөжүүлэн тэлсээр байна.

 

2021 оны хувьд дэлхий нийтийг хамарсан Ковид-19 цар тахал үргэлжилсэн жил болж өнгөрлөө. Гэсэн хэдий ч улс орон бүр вакцинжуулалтыг эрчтэй хийж, дэлхий дахинд хүмүүс энэ өвчний талаар илүү их мэдээлэлтэй болж дасан зохицох, даван туулах чадвар нэмэгдсэн нь эргээд хэвийн ажил амьдралын байдалдаа шилжихэд дөхөм болж байна. Манай улсын хувьд ч мөн адил бизнесийн байгууллагууд болон хувь хүмүүсийн хариуцлагатай байдал, урьдчилан сэргийлэх зохион байгуулалт сайжран, улс орон даяар бизнесийн орчин сэргэн, харьцангуй идэвхтэй болж эхэллээ. 

 

Говь ХК-ийн хувьд ажилтнуудынхаа эрүүл мэндийг нэн тэргүүнд чухалчилж УОК, НОК-ийн зөвлөмж, чиглүүлгийг чанд мөрдөн үйлдвэрлэл, борлуулалтынхаа үйл ажиллагааг тасралтгүй явуулж ажилласан хэдий ч манай үйл ажиллагаанд үзүүлэх цар тахлын нөлөө байсаар байна. Бид ирээдүйн урт хугацааны хөгжил дэвшлийг том зургаар харан, олон улсын зах зээлд илүү танигдах, өрсөлдөх, дэлхийн брэнд болох зорилгоор сүүлийн гурван жилийн хугацаанд стратегийн томоохон хөрөнгө оруулалтуудыг хийлээ. Үүгээрээ бид ирээдүйн өсөлт дэвшлийнхээ суурийг сайн бэлтгэж чадсан гэж дүгнэж байна.

 

Манай компани 2021 онд 144.3 тэрбум төгрөгийн борлуулалттай ажилласан бөгөөд борлуулалтын орлого өмнөх онтой харьцуулахад 23 хувь өссөн үзүүлэлттэй байна. Дэлхийн зах зээлийг чиглэн борлуулалтын сувгаа нэмэгдүүлэх зорилгоор 2019 оны 2 дугаар хагас жилээс эхлүүлсэн онлайн борлуулалт маань өдгөө 4.2 дахин өсөлтийг үзүүлсэн нь сүүлийн жилүүдэд хийсэн томоохон хөрөнгө оруулалтынхаа өгөөжийг хүртэх цаг ойртсоор байгааг илтгэж байна. 

 

Мөн бид компанийн хэмжээнд ажлын бүтээмжийг нэмэгдүүлэх, шийдвэр гаргалтыг хурдан хугацаанд оновчтой хийдэг болоход чиглэн үйл ажиллагааныхаа шат бүрд программчлал болон автоматжуулалтыг нэвтрүүлэн хөгжүүлж цахим шилжилтийг хийж байна. Үүний зэрэгцээ олон улсын нэр хүндтэй, тэргүүлэх компаниудтай хамтран ажилласнаар бидний нэр хүнд, олон улсад эзлэх байр суурь, Говь брэндийн танигдалт, хэрэглэгчид эрчимтэй нэмэгдэж чадлаа. Цахим шилжилтэд ажиллаж буй ажилчид маань олон улсын туршлагаас суралцсаар байгаа бөгөөд мэдлэг чадвар хуримтлуулж сайн бэлтгэгдэж чадсан. 

 

2022 оноос эхлэн бид хөгжил дэвшлийнхээ дараагийн том шат руугаа орж, дэлхийн өнцөг булан бүрд Говь брэндийг хүмүүс өмсдөг болох, хөрөнгө оруулалтаа нөхөж эхлэх, борлуулалтаа нэмэгдүүлэх, ашигтай ажиллах, хувьцаа эзэмшигчдийнхээ хөрөнгийг өсгөхөд бүхий л нөөц бололцоогоо дайчлан ажиллана. 

 

Энэ цаг үед биднийг үргэлж дэмжин ажиллаж буй хувьцаа эзэмшигчид, бүхий л хамтрагч, оролцогч талууд, үнэнч хэрэглэгч нартаа баярлалаа. Та бүхэнд ажлын өндөр амжилт, эрүүл энх, сайн сайхан бүхнийг хүсэн ерөөе!