2024 он Говь ХК-ийн хувьд өөрчлөлт, шинэчлэл, өсөлтийн онцгой жил байлаа. 2024 оны эхэнд миний бие Гүйцэтгэх захирлын албан тушаалд томилогдож, 43 жилийн түүхтэй энэхүү компанийн удирдлагыг хүлээн авсан нь нэр төрийн хэрэг төдийгүй томоохон хариуцлага юм. 

Миний хувьд компанийн суурь үнэт зүйлсийг хадгалж, шинэчлэл, өсөлтийг эрэлхийлэн, Монголын ноос ноолуурын салбарт тэргүүлэгч ГОВЬ брэндийг дэлхийд таниулж үйл ажиллагааны цар хүрээг тэлэх, тогтвортой хөгжил, технологийн шинэчлэлд суурилсан бодлого хэрэгжүүлэх зорилтыг дэвшүүлэн ажиллаж байна. 

Говь ХК нь 2024 онд 247 тэрбум төгрөгийн борлуулалтын орлоготой ажилласан ба үүнийг сегментээр задлавал дотоод борлуулалт 66%, экспортын борлуулалт 24%, гадаад борлуулалт 10%-ийг тус тус эзэлж байна.  

Дотоод зэх зээлийн хувьд борлуулалтыг дэмжих зорилгоор үнэнч хэрэглэгчдэд зориулсан урамшууллын хөтөлбөрийг нэвтрүүлж, төв дэлгүүрийн өнгө төрхийг бүрэн шинэчилж, хэрэглэгчдэд илүү ая тухтай үйлчилгээний орчин бүрдүүлсэн. Харин гадаад зах зээлийн хувьд маркетингийн стратегиа өөрчлөн, органик өсөлт, брэндийн үнэлэмжийг нэмэгдүүлэхэд чиглэсэн маркетинг хийж, ашигт ажиллагааг сайжруулахад төвлөрч ажиллалаа. 

2024 онд Говь ХК-ийг дэлхийн зах зээлд илүү өргөн хүрээнд таниулж, олон улсын түвшинд өрсөлдөхүйц компани болох зорилгоор Rebranding буюу брэндийн цогц шинэчлэлтийг хийснээр ГОВЬ брэнд анх удаа бэлгэ тэмдэгтэй болж, шинэчилсэн лого ба шинэ өнгө төрхтэйгөөр бүтээгдэхүүнээ хүргэж байна. 

Мөн компанийн хэмжээнд 6S аргачлалыг нэвтрүүлэх замаар үйлдвэр болон оффисын орчинд эмх цэгцийг бүрдүүлж, ажлын бүтээмжийг нэмэгдүүлэх, мэдээллийн урсгалыг сайжруулж, ажилтнуудын үр дүнтэй хамтын ажиллагааг бэхжүүлэх, шийдвэр гаргах хурдыг нэмэгдүүлж үр ашигтай менежментийг бий болгоход онцгойлон анхаарч ажилласан. 

Бид бизнесийн үйл ажиллагааг автоматжуулж, ажлын гүйцэтгэлийг хурдасгах, бүтээмжийг нэмэгдүүлэх зорилгоор системийн шинэчлэлтийг дараагийн түвшинд гаргаж, нийт компанийн хэмжээнд SAP S/4 HANA-ERP системийг амжилттай нэвтрүүлэн ашиглаж эхэлсэн. Мөн Монгол Улсын хөнгөн аж үйлдвэрийн салбарын түүхэнд анх удаа MES болон дамжлагын системийг нэвтрүүлэн ашиглаж эхэлснийг дуулгахад таатай байна. Эдгээр нь үйлдвэрлэлийн үр ашиг, бүтээмжийг нэмэгдүүлэх, процессыг сайжруулах, санхүүгийн удирдлага, шийдвэр гаргалтыг оновчтой бөгөөд хурдан хийх боломжийг бүрдүүлэх юм. 

Дизайн хөгжүүлэлтийн хувьд бүтээгдэхүүний нэр төрлийг өргөжүүлж, ноолууран гутлын олон шинэ загваруудаас гадна саравчтай малгай, цүнх, CashmereTECH куртка гэх мэт шинэ бүтээгдэхүүнүүдийг зах зээлд нэвтрүүлж, ноолуурын хэрэглээний цар хүрээг зогсолтгүй өргөжүүлснээр ноолуураар зөвхөн хувцас бус, олон төрлийн бүтээгдэхүүн хийж амьдралын хэв маягийг бүрдүүлэх боломжтой гэдгийг харуулж байна. Бид цаашид ч шинэлэг бөгөөд хэрэгцээнд нийцсэн бүтээгдэхүүн хөгжүүлж, зах зээлд нэвтрүүлэх зорилготой ажиллах болно. 

Манай компанийн амжилт нь удирдлагын баг, ажилтан бүрийн хичээл зүтгэл, хэрэглэгчдийн итгэл, хувьцаа эзэмшигчдийн тууштай дэмжлэг, харилцагч түншүүдийн хамтын ажиллагааны үр дүн гэдгийг онцлон тэмдэглэмээр байна. 

Ирээдүйд бид үнэт зүйлс болсон ажилтнуудынхаа хөгжил, оролцоог дэмжих, бүтээмж, сэтгэл ханамжийг нэмэгдүүлэх бодлогыг тууштай хэрэгжүүлж, Монголын ноолуурын салбарын тэргүүлэгчийн байр сууриа хадгалж, тогтвортой хөгжлийг эрхэмлэгч, инновацилаг компани байхын зэрэгцээ ГОВЬ брэндийг дэлхийн зах зээлд нэр хүндтэй брэнд болгох зорилгодоо тууштай ажиллах болно. 

Хамтдаа шинэ амжилтуудыг бүтээцгээе! 

Хүндэтгэсэн,  

 ГҮЙЦЭТГЭХ ЗАХИРАЛ                                        

Б.АМАРСАЙХАН